মুখ্য পৃষ্ঠা
06/04/25
15:30
কিমান দূৰ সিপাৰৰ দেশলৈ
© ৰাজু কলিতা
________________________
দুচকুৰ জোনাক যিদিনা
একুৰা লেলিহান জুয়ে কাঢ়ি লৈ গৈছিল ,
সেই দিনাই বুকুত বাজিছিল
দুৰু দুৰুকৈ অপ্ৰাপ্তিৰ গান |
নিশা বোৰ পাৰ কৰাৰ সময় আহিছিল
মৌনতাৰে কিম্বা নিসংগতাৰ মায়াৰে |
সময়ে নুবুজে বিৰহৰ গান
বিচ্ছেদত নাবাজে নুপূৰ |
পপীয়া তৰা এটা
মুৰৰ ওপৰেৰে পাৰ হৈ যোৱাৰ পৰত
অতীতে লৈ যায় নীৰবে বহু দূৰলৈ |পালতৰা এখন শুভ্ৰ নাওঁ লৈ ,
প্ৰিয়তমা উলটি অহাৰ কথা
সিপাৰৰ দেশৰ পৰা |
আকাশ খন খহি পৰা শব্দৰ ভয়ত
বুকুৰ তামীঘৰত উচুপে পুৰনি অসুখে |
স্মৃতিৰ আলমাৰিত প্ৰিয় কিতাপৰ পৃষ্ঠা
ভগ্ন সপোনে কুটি কুটি খাই শেষ কৰে
কিমান দূৰ তোমাৰ দেশলৈ প্ৰিয়তমা ?
এই দেশৰ সিপাৰে ,
মোৰ এখনেই অচিনাকি দেশ |
কোন বাটেৰে যাম তোমাৰ দেশলৈ ?
সিপাৰে আছেনে আবেগ
কিম্বা মৃত্যু যন্ত্ৰণা ?
তোমাৰ দেশৰ জোনবাইৰ জনীক সুধিবা ,
কিমান অসুখী আত্মাক তাই পহৰা দিয়ে |
তৰা বোৰক সুধিবা ,
ক'ত প্ৰেমিকে ক'ত প্ৰেমিকে নীৰৱে উচুপি |
কিমান দূৰ ?
কিমান দূৰ সিপাৰৰ দেশলৈ প্ৰিয়তমা ?
